د بازار نشتوالی؛ یو شمېر بڼوال وایي محصولات یې په ګټه نه ځي   

یو شمېر بڼوال وایي چې د بازار نشتوالي او د سړو خونو کمښت له امله مجبور دي خپل محصولات په ټیټه بیه وپلوري. بڼوال وايي، په تېرو کلونو کې یې پلور ښه و، خو د نورو کلونو په پرتله سږ کال اتیا سلنه کمښت راغلی دی او حاصلات یې څوک نه اخلي. دوی د خپلو حاصلاتو د کموالي لامل په هېواد کې وروستۍ وچکالي یادوي، خو له نوي حکومت څخه غواړي چې بهر ته د دوی د باغدارۍ محصولاتو د صادرولو لپاره اسانتیاوې برابرې کړي. د کرنې اوبو لګولو او مالدارۍ وزارت وایي چې یاد وزارت هڅه کوي چې په کرنیزو ځمکو او بڼوڼو کې د اوبو لګونې د نلونو په وسیله ونو ته د څاڅکو په ډول د اوبو رسولو سېسټم عملي کړي. د یاد وزارت د بڼوالۍ د پراختیا رییس عبدالغفار صدیقي ویلي تمه لري د افغانستان اوسنی حکومت دې برخې ته پاملرنه وکړي.