د بريتانیا ددفاع پخواني وزیران: برېتانوي ځواکونه دې ژر تر ژره بېرته افغانستان ته ستانه شي

پخواني برېتانوي چارواکي وایي ځواکونه یې دې بېرته افغانستان ته ستانه شي. د برېتانیا دوو پخوانیو ددفاع وزیرانو جاني مېرسر او توبیاس ایلووډ په یوه مرکه کې ویلي چې طالبانو په افغانستان کې خونړي بریدونه پیل کړي دي او برېتانیا باید ثابته کړي چې د نړیوال نظم د راوستو لپاره هڅه کوي او ددغه ډلې پر ضد دې اقدام وکړي. د یادو وزیرانو په خبره برېتانیا په سیمه کې هوایي ځواکونه لري او د هوایي بریدونو لپاره باید د افغان حکومت غوښتنه پر ځمکه ونه غورځوي. دغه پخوانیو برېتانوي چارواکو ویلي برېتانیا باید د افغانستان په اړه ژر تر ژره نړیوال کنفرانسونه راوغواړي او له خپلو ملګرو هېوادونو سره دې په ګډه په افغانستان کې د وضعیت د کنټرول لپاره هڅې وکړي. دوی ویلي که په افغانستان کې پر وخت اقدام ونه شي نو ددې احتمال شته چې تېرې شل کلنې لاس ته راوړنې خاورې شي او په دغه هېواد کې د نړیوالې ټولنې شل کلن حضور له پوښتنې سره مخ شي.