په هېواد کې د ګڼو ستونزو تر څنګ یوه هم د برېښنا مسئله ده. سره له دې چې د هېواد لوړه سلنه برېښنا له ګاونډیو هېوادونو وارېدېږي، خو په دې وروستیو کې د وارداتي برېښنا پر پایو پرله پسې بریدونه کېږي. په وروستیو څو ورځو کې نه یوازې دا چې د برېښنا پر تاسیساتو او پایو بریدونه کېږي، بلکې د دغه شرکت پر کارکوونکو هم بریدونه او چاودنې شوې دي. په تېرو دوو ورځو کې په کابل او پروان کې د برېښنا شرکت پر کارکوونکو چاودنې شوې چې دې مسئلې اندېښنې پارولې دي.
د هېواد د ډېرو ولایتونو برېښنا د شمالي ولایتونو له لارې وارېدېږي، خو له بده مرغه په لاره کې د جګړو او نښتو له امله ډېری وختونه د برېښنا تاسیساتو او پایو ته زیان اوړي چې په شپو شپو، ان کله په اونیو هم د کابل او څو ولایتونو برېښنا پرچاو وي. په دې وروستیو کې له جګړو ورهاخوا داسې ښکاري چې په پلان شوې توګه د برېښنا شرکت پر تاسیساتو او پایو باندې بریدونه کېږي. په تېرو څو ورځو کې په کابل او پروان کې د برېښنا شرکت پر پایو درې بریدونه شوي دي. د برېښنا یوه پایه په چمتله کې په چاودېدونکو توکو والوځول شوه، څو ورځې وروسته د چمتلې له سب سټېشن سره څېرمه بله پایه والوځول شوه خو چپه شوې نه ده، وړمه شپه بیا په پروان کې دوې پایې له لرې په راکټ وېشتل شوې چې زیانمنې شوې وې، خو چپه شوې نه وې.
سره له دې چې وسله وال طالبان د دغه بریدونو مسوولیت نه مني، خو داسې ښکاري چې دغه بریدونه د یوه منظم پلان له مخې ترسره کېږي. اوس تازه وسله والو د برېښنا شرکت پر کارکوونکو هم بریدونه پيل کړي دي. د برېښنا انجنیرانو چې کله د چمتلې له سب سټېشن سره زیانمنه شوې پایه رغوله، چاودېدونو توکو چاودنه وکړه او د دغه شرکت څلور کارکوونکي پکې ټپیان شول. له دې ډلې د دوو انجنیرانو روغتیايي وضعیت ترینګلی ښودلی شوی و. څو ساعته وروسته په همدې سیمه کې درېیمه چاودنه هم کېږي، خو چا ته پکې زیان نه اوړي.
وړمه شپه بیا په پروان ولایت کې د ولایت مقام د دیواله شاته په ګلغونډۍ سیمه کې د برېښنا دوې پایې ويشتل کېږي. پرون په پروان کې د برېښنا شرکت ځايي مسوول او انجنیران د پایو ترمیم ته ورځي چې د ماین ښکار ګرځي او له امله یې په پروان کې د برېښنا شرکت عملیاتي مرستیال وژل کيږي او څو کسه نور ټپيان کېږي. د افغانستان برېښنا شرکت دغه مسئله د جدي اندېښنې وړ بولي او پر حکومت غږ کوي چې ژر تر ژره دې د دغو پېښو عاملین ونیسي او د برېښنا پر وړاندې د سیستماتیکې دښمنۍ مخه دې ونیسي.
له دې سره هممهاله پرون د برېښنا شرکت لپاره نوی رییس معرفي شوی دی. د برېښنا شرکت نوي رییس داوود نورزي ژمنه کړې چې دغه شرکت به په یوه باوري شرکت بدلوي او په خبره یې هڅه یې دا ده چې د افغانستان د برېښنا لپاره د ولسمشر غني برنامې پر وخت او سمې عملي کړي. نوموړي ژمنه کړې چې د برېښنا شرکت د کارکوونکو ساتنه به کوي او د دوی د کار پر وړاندې شته خنډونه به له منځه وړي.
په افغانستان کې د برېښنا پر تاسیساتو د بریدونو په اړه څه موده وړاندې امریکايي ديپلوماتانو هم غبرګون ښودلی و. د جنوبي او مرکزي اسیا لپاره د امریکا د بهرنیو چارو وزارت مرستیالې الیس ویلز ویلي وو چې پر عامه تاسیساتو او برېښنا پایو د وسله والو بریدونه په کلکو ټکو غندي.
افغان حکومت که څه هم تر اوسه په دې تور د ځینو کسانو د نیولو خبره کوي، خو لا بریالی شوی نه دی چې د برېښنا پر تاسیساتو د وسله والو بریدونو مخه ونیسي. امنیتي سرچینې وايي چې دوی خپلو پلټنو ته ادامه ورکوي او هڅه کوي د دغو پېښو عاملین د قانون منګولو ته وسپاري.
