د بشري حقونو خپلواک کمیسیون: دواړه لوري دې ژر تر ژره روانه جګړه ختمه کړي

د افغانستان د بشري حقونو خپلواک کمیسیون یو ځل بیا له طالبانو او افغان حکومت غوښتي چې د خبرو مېز ته ستانه شي او ژر تر ژره دلته روانه جګړه پای ته ورسوي. ددغه کمیسیون په اعلامیه کې راغلي چې روانو جګړو عام افغانان سخت زیانمن کړي دي او هره ورځ دوی ته تلفات اړوي نو له همدې امله دا اړینه ده چې ژر تر ژره ددوحې مذاکرات یوې پایلې ته ورسېږي او دلته باید د جګړو د ختمېدو او اوربند سبب شي. د بشري حقونو خپلواک کمیسیون وایي چې د جګړو له امله پراخ مادي او معنوي زیانونه افغان ولس ته اوړي او جدي اړتیا ده چې د جګړې پر ځای د هېواد پر جوړولو او انساني حقونو پر خوندي کولو تمرکز او لګښت وشي. د بشري حقونو خپلواک کمیسیون بیا هم له دواړو لورو غواړي چې جګړه د خبرو له لارې ختمه کړي او د ولس غږ ته مراجعه وکړي.