د بشري حقونو مرکز: له ایرانه د افغان کډوالو ایستل د انساني کرامت خلاف کړنه ده

د افغانستان د بشري حقونو مرکز په خپره کړې خبرپاڼه کې له ایران څخه په جبري او ډله‌ییزه توګه د افغان کډوالو ایستل د انساني کرامت خلاف کړنه بللې ده. یاد مرکز د کډوالو په روان وضعیت اندېښنه څرګنده کړې او له نړیوالو بنسټونو یې دې مسالې ته د پاملرنې غوښتنه کړې ده. د خبر پاڼې له مخې، ایراني پولیس د افغان کډوالو په ځانګړې توګه د ماشومانو او مېرمنو سپکاوی کوي. د افغانستان د بشري حقونو مرکز د ایران پر حکومت غږ کړی چې د هغو کسانو له ایستلو ډډه وکړي چې هلته د اوسېدو اسناد لري. د دغه بنسټ په خبرپاڼه کې راغلي چې نړیوال بنسټونه دې د کډوالو له حقونو سرغړاوی او له هغوی سره د ناسم او له سپکاوي ډک چلند څېړنې وکړي.