د سولې د مشورتي لویې جرګې له پرېکړې وروسته تمه وه چې حکومت به ژر د جرګې پرېکړه ومني، بندیان به خوشې کړي او له ژمنې سره سم به په یوه اونۍ کې بین الافغاني خبرې پیل شي. دا دی یوه اونۍ پوره کېږي، خو نه یوازې دا چې د سولې خبرې پیل نه شوې، بلکې د بندیانو د خوشې کولو په تړاو د جرګې پرېکړه هم عملي نه شوه. له دې سره داسې وېره ده چې ښايي د بین الافغاني خبرو پیل لا نور هم وځنډیږي او ورسره جګړه وغځیږي.
جرګې ته وویل شول چې د طالبانو خوشې کېدونکي بندیان خطرناک دي، خو خوشې کول یې د بین الافغاني خبرو د پیل سبب کېږي، چې له همدې امله جرګې یې خوشې کول ومنل. اوس حکومت یوازې ۸۰ بندیان خوشې کړې دي او نور همداسې پاتې دي. اشرف غني کله وايي چې دا بندیان خطرناک دي او د نړۍ او افغانستان امنیت ګواښي او کله هم نورې پلمې کوي. ارګ د دې لپاره چې د خبرو پیل وځنډوي، نوې پلمې جوړوي. اوس که ارګ دا بندیان نه خوشې کوي او یا یې د خوشې کولو لپاره شرایط لري، نو بیا د جرګې رابلل، لګښت او د ولس رایه څه مانا لري!؟ له بده مرغه دوی د ولس په رایه او جرګه هم ملنډې وهي او کله چې جرګه د دوی د تمایل خلاف پرېکړه کوي، نو بیا یې په عملي کولو کې خنډ او ځنډ پیدا کوي.
د بندیانو د خوشې کولو په اړه د ارګ دریځ او کړنې په عملي ډول د بین الافغاني خبرو پیل ځنډولی دی. د بین الافغاني خبرو ځنډ د جګړې او افغان وژنې د دوام او د سولې د مخالفت په مانا دی. ارګ چې د دې ځنډ لپاره کوم دلایل تراشي، هغه نه معقول دي او نه هم سم. له همدې امله د جګړې او ټولو وژنو پړه یې پر غاړه ده او په دې تړاو به له چارواکو سره حتمي حساب کېږي.
دا سمه ده چې په ځینو مسایلو کې طالبان هم پړه دي، دریځ یې سخت دی، خو معلوم دی او واضح دریځ لري. حکومت له بده مرغه بیا بیا خپل دریځ بدلوي، سرې کرښې باسي او بیا یې ړنګوي. ګډوډې او متضادې خبرې کوي او واضح دریځ نه لري. که حکومت واضح دریځ ولري او له خپله اړخه د سولې په برخه کې ګامونه واخلي، نو بیا که طالبانو مخالفت کاوه او ستونزه یې جوړوله، نو مسوولیت به یې پر غاړه وي او خلک به پرې فشار راوړي. اوس خو له بده مرغه حکومت خپله دنده نه ترسره کوي، ستونزې او خنډونه جوړوي او واضح ښکاریږي چې د سولې د بین الافغاني خبرو د پیل پر وړاندې خنډونه جوړوي.
ولس د سولې مخالفت او د بین الافغاني خبرو ځنډ نه شي زغملی. له همدې امله دواړه اړخونه او په ځانګړي ډول حکومت باید دا درک کړي. که دا حالت دوام وکړي، ولس به مجبور شي چې یو ګام واخلي او د هغوی پر ضد ودریږي چې د سولې مخالفت کوي او د خبرو د پیل او بریا پر وړاندې خنډونه جوړوي.
