د چین د يونيکورن شرکتونو د ۲۰۲۶م کال څېړنيز راپور ښيي، چې تېر کال په دې هېواد کې د دغو شرکتونو عمومي شمېر ثابت زياتوالی موندلی او تخنيکي ځانګړتيا او نوښتي حياتي انجين يې ښکاره کړی دی.
په چين کې هغه شرکتونه د يونيکورن تصدۍ په نوم ياديږي، چې پر جوړېدو يې له ۱۰ کلونو کم وخت تېر شوی وي او اټکلي ارزښت يې له يو ميليارډ امریکايي ډالرو څخه زیات وي، دغه تصدۍ ځانګړې کليدي ټکنالوژي او رقابتي ځواک لري، خو د ونډو په بازار کې ځای نه لري.
دغه تصدۍ معمولأ د سيمې د نوښتي حياتي ځواک او د صنعتي سيالۍ د وړتيا مهمه نښه هم ګڼل کېږي.
په راپور کې د تېر کال تر پايه، د چين د يونيکورن تصديو عمومي شمېر ۳۷۶ ښودل شوی، چې دا د وړم کال په پرتله ۳۵ زياتوالی ښيي او عمومي اټکلي ارزښت يې ۱۴۴۶ ميليارډو او ۷۰۰ میليونو امريکايي ډالرو ته رسېدلی دی.
په راپور کې د هر يونيکورن شرکت منځنی اټکلي ارزښت درې ميليارډه او ۸۵۰ ميليونه امريکايي ډالره ښودل شوی، چې دغه شمېر د وړم کال د همدې مودې د ورته شمېر په پرتله ۵۱۰ ميليونه ډالره زياتوالی موندلی دی.
راپور وايي، په یادو يونيکورن تصديو کې د ۱۲ تصديو اټکلي ارزښت بیا له ۱۰ ميليارډو ډالرو زیات دی چې د سوپر يونيکورن تصدۍ په نوم ياديږي.
