د چين حکومت د جولای په ۱۵مې نېټې د روان کال د لومړۍ نيمايي اقتصادي راپور خپور کړی، چې د يو شمېر بهرنيو رسنيو پاملرنه يې راجلب کړې ده.
په دغه راپور کې ویل شوي، چې د روان کال په لومړۍ نيمايي کې د چین ناخالص کورنی توليد ۶۹ ټريليونو،۵۷۰ ميليارډو او ۴۰۰ ميليونو يوانو ته رسېدلی، چې د تېر کال د همدې مودې په پرتله ۴ اعشاريه ۷ سلنه زياتوالی لري او په نړۍ کې يې مخکښ ځای نيولی دی.
سږکال نړيوال وضعيت له سختو بدلونونو او کړکېچونو سره مخ دی، چې له امله يې نړیوال اقتصاد له لوړو ژورو تېرېږي، بلکې لږ څه ټيټ شوی هم دی.
د پيسو نړیوال صندوق څه موده مخکې یو ځل بيا د روان کال د نړيوال اقتصاد د زياتوالي اټکلي انډول ۳ سلنې ته ټيټ کړی او په ورته وخت کې يې د چيني اقتصاد د زياتوالي اټکلي انډول ۴ اعشاريه ۶ سلنې ته لوړ کړی دی.
د چين د روان کال د لومړۍ نيمايي اقتصادي راپور د دې ښکارندويي کوي، چې د دغه هېواد اقتصاد له افشارونو سره سره ثابت ساتل شوی او مخ په ښه کېدو روان دی.
د چین د اقتصاد اوسنۍ عمومي اندازه له ۱۴۰ ټريليونو يوانو څخه اوښتې ده.
کارپوهان دا ډېره سخته بولي، چې د چين اقتصاد له نړيوالو پېچلو حالاتو سره سره ۴ اعشاريه ۷ سلنه زياتوالی موندلی دی.
د چين د اوسني ناخالص کورني توليد زياتوالی د تېر کال د همدې مودې په پرتله، ۳ اعشاريه ۶ ټريليونو يوانو ته رسېدلی، چې دغه شمېر د تېرو پنځو کلونو د ورته مودو په پرتله هم ډېر زياتوالی ښيي.
ځينو رسنيو په راپورونو کې ويلي، چې د روان کال په دوهمې ربعې کې د چين د اقتصاد زياتوالی ټيټ شوی دی.
دلته د يادونې ټکی دا دی، چې د چين د اقتصاد دغه ټيټوالی د نفتو او سکرو د صنايعو د لنډمهالي اغېزې له امله رامنځته شوی او ځينو نړيوالو سازمانونو هم اټکل کړی و، چې د روان کال په دوهمې ربعې کې به د عمده نړيوالو اقتصادونو زياتوالی ورو او ټکنی وي.
خو اوږدمهال ته په کتو، د چين اقتصاد لا هم ثابت او مخ په ښه کېدو روان دی.
د روان کال په لومړۍ نيمايي کې د چين د لويو صنعتي تصديو د تولید اضافي ارزښت د تېر کال د همدې مودې په پرتله ۵ اعشاریه ۴ سلنه زياتوالی موندلی، د مصرفي توکو او خدمتونو د پرچون عمومي اندازه یې ۲ اعشاريه ۷ سلنه زياته شوې، د کارموندنې وضعيت یې ثابت ساتل شوی او د توکو بيې نرمې لوړې شوې دي.
دا د دې څرګندويي کوي، چې د چين اقتصاد ثابت روان دی او د دې ترڅنګ، نړيوال اقتصاد ته يې هم ثبات رسولی دی.
سي اېن بي سي په يوې شننې کې ويلي، چې د چين د پرچون او صنعتي توليد شمېرې تر وړاندوينې ښې دي او دغه هېواد د اقتصاد د لنډمهالې هڅوونکې پاليسۍ د انتخاب په برخه کې نور هم ښه فرصتونه لري.
د روان کال په لومړۍ نيمايي کې د نړۍ په ډېرو سیمو کې شخړې او سیاسي کړکېچونه روان وو او پر نړيوال تجارت یې بد سیوری غوړلی دی.
د سږ کال په لومړۍ نيمايي کې، د چين د توکو د وارداتو او صادراتو عمومي اندازه له نړيوالو کړکېچونو او کشمکشونو سره سره، د تېر کال د همدې مودې په پرتله ۱۶ اعشاريه ۹ سلنه زياته شوې، چې په دې جمله کې وارداتي اندازه يې ۲۲ اعشاريه ۱ سلنه زياته شوې ده.
چين د ۶۳ هېوادونو پر توليداتو د صفر تعرفې تګلاره پلې کړې او په تېرو مسلسو ۱۷ کلونو کې یې وارداتي اندازې د نړۍ دوهم ځای نيولی دی.
د چين لوی بازار نړۍ ته پراخ فرصتونه برابروي او د نړیوال صنعتي ځنځير او اکمالاتي ځنځير او نړيوال تجارت لپاره يې ثابت ملاتړ برابر کړی دی.
