پخوانی ولسمشر حامد کرزی پرون په یوه خبري کنفرانس کې را څرګند شو او د نورو مسایلو تر څنګ یې وویل چې ژر به د سولې جدي خبرې پیل شي او یوې پایلې ته به ورسېږي. حامد کرزي پر خلکو او په ځانګړي ډول ځوانانو غږ وکړ چې په همدې هېواد کې پاتې شي او خدمت وکړي. نوموړي وویل هغه وېره باید له ځانه لرې کړو چې په رسنیو کې یې اورو. د ده په وینا، حالات به سم شي او د سولې خبرې به نتیجه ورکړي. حامد کرزي پر طالبانو او حکومت هم غږ وکړ چې جګړه ودروي، ځکه دا یوه پردۍ دسیسه ده او د دسیسې د شنډولو لپاره باید سوله وشي.
په داسې حال کې چې خلک حالاتو سخت اندېښمن کړي او له ناوړه راتلونکې وېره لري، د پخواني ولسمشر دا څرګندونې ډېرې مهمې دي. دا خبرې خلکو ته ډاډ ورکوي او مثبته روحیه اخلي. په دې خبرو سره خلکو ته دا پیغام هم رسېږي چې د سولې لپاره هڅې روانې دي او ځینې مشران په دې چاره کې هلې ځلې هم کوي. که نور مشران هم د حامد کرزي په شان را څرګند شي او همداسې واضح او مثبتې خبرې وکړي او د سولې لپاره جدي ګامونه واخلي، نو د خلکو به اندېښنې لرې شي او له راتلونکې به یې وېره کمه شي. له همدې امله د حامد کرزي خبرې مثبتې او یو ښه ډاډ دی.
د حامد کرزي ډاډ که ښه دی، خو پوښتنه دا ده چې څومره تکیه پرې کېدلی شي؟ دا سمه ده چې د سیاسي مشرانو یو کار دا دی چې خلکو ته ډاډ او روحیه ورکړي، خو ورسره سم باید د هغه حالت لپاره هم هلې ځلې وکړي چې خلک پکې ډاډمن کېدلی شي. د سولې په پروسه کې د حامد کرزي مثبت رول څرګند دی او له هلو ځلو یې هم ښکاري چې سوله غواړي او په دې برخه کې په خپل ټول وس او توان کار کوي. له بله اړخه حامد کرزی په همدې هېواد کې دی، بچیان او کورنۍ یې همدلته دي، نو ځکه دا چاره هم خلکو ته ډاډ ورکوي. اوس پکار ده چې نور مشران هم خلکو ته همداسې ډاډ ورکړي، خو ورسره سم هم باید خپلې کورنۍ او بچیان دلته وساتي او هم باید د سولې لپاره عملي او رښتینې هلې ځلې وکړي. دا چاره کولی شي چې نه یوازې د خلکو وېرې او اندېښنې کمې کړي، بلکې په عملي ډول د راتلونکي ګواښ مخه ونیسي او سولې ته لاره هواره کړي.
اوس د جګړې دواړو اړخونو ته پکار ده چې هغه دسیسې درک کړي چې حامد کرزي یې یادونه وکړه او د جګړې پر ځای پر سوله تمرکز وکړي. دوی که څه هم په خبرو کې دا کار کوي، خو خلک هیله لري چې په عمل کې دا کار وکړي. د جګړې دواړه اړخونه باید نور د جګړې عمل، خبرې او ذهنیت بند کړي او پر ځای یې د سولې خبرې، عمل او ذهنیت خپل کړي. په دې ډول به هم دوی د بهرنیو له دسیسو ژغورل شوي وي او هم افغانستان.
