په بین الافغاني خبرو کې د خنډونو له جوړېدو سره هممهاله د دغو مذاکراتو او د دوحې د هوکړې په اړه نوي مسایل رامنځ ته شوي دي. طالبانو ویلي چې په امریکا کې نوی جوړېدونکی حکومت باید د دوحې هوکړې ته ژمن وي او عملي یې کړي، خو افغان حکومت بیا وایي چې نوی امریکايي حکومت دې پر دې هوکړه له سره کتنه وکړي، ځکه ډېرې ستونزې لري. د افغان حکومت مذاکراتي پلاوی بیا وایي چې خبرې له نامعلوم برخلیک او سترو خنډونو سره مخ دي، ځکه د طالبانو غوښتنې د نه منلو وړ دي.
سره له دې چې د افغانستان د سولې مسئله له لومړي سره د امریکا د ولسمشر ډونالډ ټرمپ لپاره یوه کمپایني مسئله بلل کېده، خو اوس په امریکا کې د نوي حکومت له راتګ سره د دوحې هوکړې د له منځه تلو وېره هم شته ده. په ټولنیزو رسنیو کې او افغان سیاسي فعالین پر دې باور دي چې ښایي بایډن د سولې له هوکړې سره مخالفت وکړي او یا هم له دې موافقې تېر شي، خو د افغانستان د مسئلې له مهم والي سره سره، جو بایډن تر اوسه په دې اړه هېڅ راز غبرګون نه دی ښودلی.
افغان حکومت بیا له بایډن او د ده په مشرۍ له جوړېدونکي حکومت غواړي چې د سولې پر هوکړه له سره کتنه وکړي. د ولسمشر غني لومړي مرستیال سرور دانش پرون په کابل کې په یوه غونډه کې د خبرو پر مهال وویل چې طالبانو پر خپلو ژمنو عمل نه دی کړی، تاوتریخوالی یې ډېر کړی، جګړې یې شدیدې کړې، له ترهګرو ډلو سره یې اړیکې نه دي پرې کړې او دا ټول هغه څه دي چې د سولې پر ځای جګړې ته د دې ډلې ژمنتیا ښيي. نوموړي همدا راز د خپلو خبرو پر دوام ویلي چې افغان حکومت د دوحې هوکړې ته هېڅ راز مسوولیت نه لري، ځکه هغه د طالبانو او امریکا ترمنځ هوکړه ده چې په افغان حکومت پورې هېڅ اړه نه لري. سرور دانش پر امریکا غږ کړی چې د سولې پر هوکړه له سره کتنه وکړي او په دې توګه دې په دې برخه کې ټولې شته ستونزې حل کړي. د سرور دانش په خبره: ((موږ د افغانستان حکومت په توګه دا هوکړه نه لاسلیک کړې، نه یې یو لوری یو، نه مو توحید کړې او له حقوقي او قانوني اړخه، د هغه څه په اړه چې د هوکړې په جزیاتو کې راغلي، هېڅ ډول مسوولیت هم نه لرو)).
سرور دانش دا هم وویل چې طالبانو تاوتریخوالی ډېر کړی او افغان حکومت د ولس له لوري د پنځه زره نه زیاتو طالب زندانیانو د خوشي کولو له امله تر فشار لاندې دی. هغه د دې ستونزې د حل یوازینۍ لار دا بولي چې امریکایي نوی حکومت پر هوکړه بیا کتنه وکړي او خنډونه یې له منځه یوسي.
بلخوا طالبان بیا د جو بایډن له حکومت د دې هوکړې د عملي کولو او ساتلو تمه لري. سره له دې چې طالبانو په رسمي اعلامیه کې تر دې دمه د امریکا د ټاکنو په اړه دریځ نه دی څرګند کړی، خو د دې ډلې د قطر دفتر ویاند ډاکټر نعیم وایي، د دوحې هوکړه د افغانستان او امریکا دواړو په ګټه ده او باید عملي کړل شي. نوموړي له رسنیو سره په خبرو کې ویلي چې د جوبایډن په مشرۍ د امریکا نوی حکومت باید هوکړه عملي کړي او د سولې لپاره کار وکړي. ډاکټر نعیم یو ځل بیا ویلي چې د دوحې هوکړه باید د مذاکراتو لپاره اساس وي او پر دې مسایلو بحث شوی دی. د ده په خبره: ((د دوحې هوکړه باید د مذاکراتو لپاره بنسټ وي، پر دې موږ بحث کړی دی، په دې کې د ټولو ګټه ده)).
د افغان دولت د مذاکراتي پلاوي غړی نادر نادري بیا وايي چې د طالبانو د خبرو منل او ددوی غوښتنې عملي کول امکان نه لري. هغه وایي له دغه ډلې سره خبرې له خنډونو سره مخ دي او تر دې دمه هېڅ راز پرمختګ پکې نشته دی.
