تېره میلادي میاشت د کابل ښاریانو لپاره خورا خونړۍ وه. د راپورونو له مخې، په تېره میلادي میاشت کې په کابل ښار کې ګڼ بریدونه او چاودنې شوې دي چې له امله یې تر ۳۰ ډېر ملکيان وژل شوي او تر ۹۰ ډېر نور ټپیان شوي دي. دا پېښې داسې مهال کېږي چې د ولسمشر لومړي مرستیال د کابل ښار د امنیت مسوولیت پر غاړه اخیستی دی. بلخوا حکومت د امنیتي میثاق په نامه پروګرام هم پیل کړی چې ادعا کوي له دې لارې د کابل په امنیت کې پوره بدلونونه راغلي دي.
څه باندې یوه میاشت کېږي چې د کابل ښار د امنیت مسوولیت د ولسمشر لومړي مرستیال امرالله صالح ته سپارل شوی دی. د نوموړي له لوري هر سهار د شپږنیمو جلسې ترسره کېږي او په هغه کې د کابل ولایت ترهګریزې، جنايي او نورې امنیتي پېښې ارزول کېږي. سره له دې چې د هغه له فعالیتونو سره سم په کابل کې جنایي پېښې راکمې شوې، خو امنیتي او ترهګریزې پېښې لا هم پر خپل ځای دي.
د کورنیو چارو وزارت یوه باوري سرچینه وایي چې وسله والو طالبانو تېره میاشت په کابل ښار کې تر ۱۵ پورې بریدونه او چاودنې کړې دي. د کورنیو چارو وزارت ویاند طارق آرین سره له دې چې د شوو چاودنو او بریدونو د شمېر او تلفاتو په اړه څه نه وایي، خو زیاتوي چې امنیتي ځواکونو ګڼ بریدونه او د ترهګریزو پېښو لپاره د وسله والو جوړ کړي پلانونه خنثی کړي دي. د آرین په خبره، د دې پېښو په تړاو د کابل امنیتي منسوبینو ګڼ کسان نیولي دي. هغه وايي: ((په کابل کې د موټر بمونو مخنیوی شوی، د مقناطسي ماینونو په تړاو مو هم یو شمېر کسان نيولي، هغه شبکې چې په دې برخه کې ښکېلې وې، هغوی هم دوې ورځې وړاندې ونیول شوې، خو بیا هم زموږ کار روان دی)).
سره له دې هم تېره میاشت د کابل ښاریانو لپاره خونړۍ وه. پر کابل پوهنتون ډلهییز ترهګریز برید وشو چې دا پېښه خورا بوږنوونکې وه او په نړیواله کچه یې غبرګونونه لرل. وسله والو داسې مهال پر کابل پوهنتون برید وکړ چې محصلین په زده کړو بوخت وو، نو له همدې امله یې تلفات هم ډېر وو. په دې پېښه کې ۲۲ محصلین ووژل شول او تر ۴۰ پورې نور ټپیان شول.
له دې پېښې څو ورځې وروسته پر کابل ښار ۲۴ توغندیز بریدونه وشول. د دې پېښې له امله هم لس ملکیان ووژل شول او تر ۵۰ پورې نور ټپیان شول. دا پېښه هم خورا ټکان ورکوونکې وه او په کابل کې یې د ګڼو سفارتونو او نړیوالو ادارو غبرګونونه له ځان سره لرل.
بلخوا د ولسمشر لومړی مرستیال امرالله صالح چې د کابل د امنیت مسوول دی او دغه راز د امنیتي میثاق د تنظیم په چارو کې لوی لاس لري، وايي چې امنیتي ادارو ګڼې ترهګریزې پېښې خنثی کړي او د ترسره شوو پېښو په تړاو یې هم ګڼ کسان نیولي دي. امرالله صالح په خپلو ورځنیو خپرو کړو نوټونو کې څو ځله د کابل پوهنتون د برید عاملینو د نیول کېدو خبر ورکړی، خو تر دې دمه د دغې دوسیې پایلې نه دي روښانه شوي.
د دې تر څنګ په کابل ښار کې په دې وروستیو کې نږدې هره ورځ د مقناطیسي یا ځای پر ځای شوي ماین چاودنې کوي. د یوه راپور له مخې، په تېرو لسو ورځو کې په کابل ښار کې د مقناطیسي ماینونو لس چاودنې شوې دي. پر کابل ښار راکېټي بریدونو او دغه لسو چاودنو څوارلس کسان وژلي او ۷۰ نور یې ټپیان کړي دي. تر ډېره دغه چاودنې پر دولتي موټرو پورې د نښلولو شوو مقناطیسي ماینونو د چاودنې له امله رامنځ ته شوې دي. کورنیو چارو وزارت او د لومړي مرستیال مطبوعاتي دفتر په دې اړه هم د ګڼو کسانو د نیول کېدو خبر ورکوي.
بلخوا کابل ښاریان دلته د روان امنیتي وضعیت په اړه اندېښمن دي. دوی له حکومتي او امنیتي چارواکو غواړي چې ژر تر ژره دې د کابل ښار د امنیت په تامین کې خپلې هڅې ډېرې کړي او په داسې اقداماتو دې لاس پورې کړي چې پایله یې د نا امنیو کمېدل وي.
