د قوش تېپې کانال د لومړي فاز چارې ۹۹ سلنه پای ته رسېدلي

د قوش تېپې کانال د لومړي فاز چارې ۹۹ سلنه پای ته رسېدلي. د یادې پروژې انجنیران وایي، د قوش تېپې کانال کارونه د معمول په څېر دوام لري او د لومړي فاز کارونو له بشپړېدو سره به يې د نورو فازونو چارې پيل شي. په ورته وخت کې د قوش تېپې کانال ته څېرمه مېشت خلک د ياد کانال له عملي چارو خوښ دي، خو غوښتنه کوي، چې يادې چارې دې نور هم چټکې شي. دا کانال چې ۲۸۵ کیلومتره اوږدوالی او له ۱۰۰ مترو زيات پلنوالی لري، د افغانستان په شمال کې د اوبو د لېږد تر ټولو ستره پروژه ده چې د امو له سیند څخه د ۱۰ میلیارد متر مکعبه اوبو د لېږد ظرفیت لري. د قوش تېپې کانال په جوړېدو سره به د بلخ، جوزجان او فاریاب ولایتونو ۵۵۰ زره هکتاره ځمکه خړوبه شي.