د مسکو غونډه؛ افغانستان کې د ټولګډونه حکومت پر جوړولو ټينګار شوی

د افغانستان په تړاو د مسکو ناستې ګډونوالو يو ځل بيا د ټولګډونه حکومت پر جوړولو د ټينګار ترڅنګ له سرپرست حکومت يې غوښتي چې د ترهګرو ډلو د له منځه وړلو لپاره جدي اقدامات وکړي. د مسکو فارمټ غونډه کې چې پرون ترسره شوه، پکې د چین، تاجکستان، ازبکستان، ترکمنستان، ایران، پاکستان، هند، قرغزستان، قزاقستان او روسیې استازو ګډون کړی وو او د ترکیې، قطر، متحده عربي امارات او د سعودي عربستان استازو د ناظرینو په توګه برخه اخیستې وه. د افغانستان په اړه د روسيې ځانګړي استازي ضمير کابلوف ویلي، د افغانستان سرپرست حکومت يې ځکه دې غونډې ته نه و غوښتي، چې هغوی خپلې ژمنې نه دي عملي کړي. د يادې ناستې په پای کې يوه ګډه اعلامیه خپره شوې چې پکې په افغانستان کې د ټولګډونه حکومت پر جوړولو ټينګار شوی، چې پکې د ټولو مهمو سیاسی، توکميزو ډلو ګټو ته پکې پام شوی وی. د غونډې ګډونوالو وويل، چې په افغانستان کې د ګاونډيانو په ګډون د نورو هېوادونو د پوځي تاسيساتو جوړول د منلو وړ نه دي. په اعلامیه کې د ملګرو ملتونو په ګډون په افغانستان کې له چارسمبالي حکومت سره د همکارۍ لپاره د ګډې او همغږې تګلارې غوښتنه وکړه او د ملګرو ملتونو تر څارنې لاندې يې د افغانستان په اړه د بین الافغاني مذاكراتي ډلې له جوړېدو ملاتړ وکړ. دغونډې ګډونوالو دغه راز د افغانستان د کنګل شویو شتمنیو د خوشې کولو غوښتنه هم کړې ده.