د نړۍ هېوادونو د افغانستان د سوکالۍ لپاره د متحد کېدو غوښتنه کړې

د ملګرو ملتونو د بشري حقونو په شورا کې د افغانستان دایمي استازولۍ پر خپله اېکس پاڼه لیکلي، چې افغانستان لا هم د نړیوالې ټولنې د پام وړ هېواد دی. یادې استازولۍ ویلي، چې په جوړه شوې غونډه کې د افغانستان د سیاسي وضعیت، سولې، بشرپاله مرستو او د بشري حقونو اړوند مسلو د هوارولو د پیل لپاره د بل هروخت په پرتله څرګند ملاتړ موجود وو. یادې استازولۍ ټینګار کړی چې نړۍ باید د افغانستان څو اړخیز او د بدلون په حال کې بحران د سمبالولو لپاره متحده شي. د ملګرو ملتونو د بشري حقونو د شورا ۵۵ غونډه د روان ۲۰۲۴ کال د فبرورۍ د میاشتې له ۲۶ څخه د مارچ د میاشتې تر پنځمې ورځې روانه وه. د ملګرو ملتونو د بشري حقونو د شورا عالي کمیشنر ولکر ترک دې غونډې ته په وینا کې وویل د ښځو او نجونو د حقونواړوند مسایل باید د ټولو هغو کسانو په کاري لومړیتوبونو کې شامل وي چې د افغانستان په اړه او یا هم په دغه هیواد کې کارکوي.