د هند په یو تونل کې بند پاتې لسګونه کارګر وژغورل شول

د هند په اتراکنډ ایالت کې د ژغورنې کارکوونکو ویلي هغه ۴۱ تنه کارګران یې ژغورلي چې د تېرو ۱۷ ورځو راهیسې په یو نړېدلي تونل کې ایسار پاتې وو. دا کارګران هغه مهال په تونل کې بند پاتې شول چې د نومبر په ۱۲مه د تونل ځینې برخې ونړېدې. دا کارګران د یاد ۴.۵ کیلومتره اوږد تونل په ۵۷ مترۍ کې بند پاتې وو او په دغو ورځو کې ورته اوبه، خواړه، د رڼا وسایل، اکسېجن، درمل او نورې اسانتیاوې د یو پایپ له لارې لېږدول کېدل. هندي چارواکو له ژغورل شويو کسانو سره له تونل د باندې لیدلي او هغوی یې خپلو کورنیو ته سپارلي دي. د هند صدراعظم نریندرا مودي د ژغورل شویو کارګرانو په اړه په یو بیان کې ویلي چې د دوی زړورتیا او زغم الهام بخښونکی دی.