د ولسي جرګې غړي: د پوهنې وزارت رهبرۍ، د پوهنې بهیر له سقوط سره مخ کړی دی

د ولسي جرګې غړي وایي د پوهنې سکتور په بشپړه توګه له سقوط سره مخ دی. په ولسي جرګه کې د کابل د خلکو استازي رمضان بشردوست نن د ولسي جرګې په عمومي غونډه کې د خبرو پر مهال وویل چې په هېواد کې د معارف اوسنی وضعیت خورا بوږنوونکی او د جدي اندېښنې وړ دی. نوموړي وویل د پوهنې وزارت اوسنۍ رهبري په بشپړه توګه کمکاره او بې پروا ده او د پوهنې بهیر یې له سقوط سره مخ کړی دی. دده په خبره ان د پلازمینې کابل ښوونځي، ښوونکي نه لري، کتابونه نه لري، ودانۍ نه لري او لسګونه نورې ستونزې شته چې د پوهنې په برخه کې موجودې دي خو د پوهنې وزارت چارواکي یې په ختمولو نه دي بریالي شوي. هغه وایي که وضعیت همداسې روان وي دا به د هېواد راتلونکي نسل ته خطرناکه او نه جبرانېدونکې ضربه وي.