د پاکستان ادعا؛ له افغان خاورې زموږ پر ضد فعالیتونه دوام لري

د پاکستان د کورنیو چارو وزیر رانا ثناء الله ادعا کړې ده چې  ټي ټي پي د  افغانستان خاوره د بریدونو لپاره د دوی پر ضد کاروي. نوموړي پرون په اسلام اباد کې یوه خبري کنفرانس ته ویلي چې د کویټې د برید مسوولیت چې تحریک ط البان پاکستان اخیستی، د اندېښنې وړ خبره ده. وړمه ورځ د بلوچستان په کویټه ښار کې د یوه برید په پایله کې څلور تنه ووژل شول او ۲۰ نور ټپیان شوي وو. د پاکستان تحریک ط البان د دې مسوولیت اخیستی و. هغه زیاته کړه، چې د ټي ټي پي مشران اود پنځو تر شپږو زرو غړي په افغانستان کې پټ دي او دغه خاوره د پاکستان پر ضد کاروي. د نوموړي په وینا، د افغانستان سرپرست حکومت له نړۍوالو سره ژمنه کړې چې هېواد به یې د نورو هېوادونو پر ضد نه کارول کیږي، خو اوس داسې کېږي. دی وایي، که چې کابل له نړۍ سره یو ځای تعامل کول غواړي، نو بیا له نړۍوالو سره په خپلو ژمنو عمل وکړي. د افغانستان حکومت د پاکستان د کورنیو چارو وزیر اوسنیو څرګندونو په اړه کوم غبرګون نه دی ښودلی، خو تر دې مخکې یې د پاکستان د لومړي وزیر او بهرنیو چارو وزیر ادعاوې په کلکه رد کړې وې.