د پاکستان د بهرنیو چارو وزارت: اسحاق ډار نن کابل ته سفر کوي

د پاکستان د بهرنیو چارو وزارت په یوه خپره کړې خبرپاڼه کې ویلي، چې د دغه وزارت وزیر محمد اسحاق ډار به نن پنج‌شنبه د (چنګاښ ۲۶مه) کابل ته سفر وکړي. د خبرپاڼې له مخې ډار به د سرپرست حکومت د چارواکو څنګ له ازبک چارواکو سره د ازبکستان، پاکستان او افغانستان د رېل پټلۍ ګډې پروژې هوکړه‌لیک لاسلیک کړي. په خبرپاڼه کې راغلي، چې په دغه یو ورځني سفر کې به له ډار سره د پاکستان د رېل پټلۍ وزیر، د افغانستان لپاره ځانګړی استازی محمد صادق او یو شمېر نور چارواکي هم ملیتا وکړي. په خبرپاڼه کې دغه راز زیاته شوې، چې د یادې هوکړې د لاسلیک موخه د ازبکستان، افغانستان او پاکستان ترمنځ د رېل پټلۍ جوړېدو او پرې د سوداګریزو اړیکو رامنځته کول دي.