د پومپیو څرګندونو ته د ارګ غبرګون: طالبان اوس د افغانستان د حکومت او خلکو پر وړاندې جنګېږي

وروسته تر هغه چې د امریکا د بهرنیو چارو وزیر مایک پومپیو وویل چې په تېر یو کال کې په افغانستان کې هیڅ بهرنی عکسر د طالبانو په برید کې نه دی وژل شوی او دا یو ستر پرمختګ دی، ارګ د نوموړي څرګندونو ته غبرګون کې ویلي چې طالبان اوس د افغانستان د خلکو او حکومت پر وړاندې جنګېږي او همدا لامل دی چې د بهرنیو عسکرو د مرګ ژوبلې کچه صفر ته راښکته شوې ده. د ولسمشر د ویاند مرستیال دواخان مینه پال په همدې اړه یو ویډیویي پیغام کې زیاته کړې، چې په دې وروستیو کې د ملکي تلفاتو کچه په بېساري توګه لوړه شوې ده. د یادونې ده چې د امریکا-طالبانو د دوحې تر هوکړې وروسته په افغانستان کې جګړې زور اخیستی دی او له امله یې د جګړې د دواړو لوریو ترڅنګ ملکي مرګ ژوبله هم خپل اوج ته رسېدلې ده.