پر لوی پولي ځواک د بدلېدو لپاره د چين موخه د پراخې ستراتيژۍ حساسه برخه ده څو په نړيوال سټېج کې د دغه هېواد موقف لوړ کړي، اقتصادي ودې ته یې تنوع ور وبښي او پر نړيوال پولي سيسټم یې تکيه کمه کړي. د نړۍ د دويم لوی اقتصاد په توګه او تر خورا ډيرو اقتصادي او ټکنالوژيکي پرمختګونو وروسته د چين تر ټولو مهم هدف دا دی چې په نړيواله کچه پياوړی پولي سيسټم ولري.
د سپټمبر په پنځمه نېټه دوو دولتي بروکرونو هر يوه ګوتای جونان سيکيوريټيز او هايتونګ سيکيوريټیز د يو ځای کېدو اعلان وکړ. د دوی تر يو ځای کېدو وروسته به د چين په مالي سکټور کې خورا پياوړې اداره رامنځته شي چې پانګه به یې ۲۳۰ ميلياردو ډالرو ته ورسيږي او تر اوسني ستر شرکت سيټيک سيکيوريټيز به مخکې شي.
دا اقدام د هغې پراخې ستراتيژۍ يوه برخه ده چې د چين د ۱.۷ ټريليونه مالي سکټور د ثبات او د پانګونې د داسې بانکونو د رامنځته کېدو لپاره پلې کيږي چې د والسټريټ له سترو بانکونو او کمپنيو سره د سيالۍ جوګه وي. په دې برخه کې د چين موخه څرګنده ده: تر ۲۰۳۵م کال پورې د پانګونې د دوو يا دريو داسې بانکونو جوړول چې په نړيواله کچه سيالي وکړای شي.
د لویو بانکونو جوړول په نړيوال مالي سيسټم کې د اغېز د پراخولو لپاره د چين د موخې څرګندونه کوي. په تاريخي لحاظ، د چين مالي سيسټم د کورنيو مارکېټونو د اړتياوو پر پوره کولو متمرکز و. د بروکرونو ادغام په يادې ستراتېژۍ کې د بدلون نښه ده. چين نور نه غواړي چې سيمه ييز مالي لوبغاړی وي، بلکې غواړي چې د لويديځ تر سلطې لاندې لويديځ مالي نظام وننګوي.
په تېره يوه لسيزه کې د والسټريټ اړوند کمپنيو په چين کې خپل فعاليتونه پراخ کړل او د دغه هېواد له مالي مارکېټ څخه يې د پام وړ ګټه ترلاسه کړه. د نړۍ سترو مالي شرکتونو په دغه هېواد کې د پښو ځايونه پراخ کړل او مختلف خدمتونه یې پيل کړل. په مقابل کې یې د چين ځايي کمپنيو هم هڅې وکړې څو د هغوی له شرایطو سره ځانونه عيار کړي. د دې هر څه په غبرګون کې چين اوس غواړي چې کورنۍ مالي مؤسسې تقويه کړي څو نه يوازې په کور د ننه سيالي وکړي، بلکې په نړيواله کچه هم لویديځې کمپنۍ وننګوي.
دغه مهم ګام څو مهمې ګټې لري. لومړی؛ په نړيوال مالي نظام کې مقياس مهم دی. په چين کې د دوو لويو بروکرونو په ادغام سره، يو داسې لوی شرکت رامنځته کيږي چې د مقياس، سرچينو او پانګې له پلوه په نړيواله کچه سيالي وکړای شي. لوی مقياس مثمريت لوړوي، عملياتي لګښتونه راکموي او مالي مؤسسو ته دا وړتيا ورکوي چې په نړيواله کچه لویې او مغلقې معاملې وکړي.
دويم؛ د مالي مؤسسو ادغام د چين د مالي مقاومت د ډيريدو سبب کيږي. لویې مالي مؤسسې د اقتصادي ضربو او د مارکېټونو د بدلونونو پر مهال په کور د ننه او نړيواله کچه د چين مقاومت لوړوي. په مالي سکټور کې د پاشلتيا په کمولو سره چين د بهرنۍ پانګونې د جلبولو لپاره هم د يوه چوکاټ د رامنځته کولو هڅې کوي.
درېيم، دا اقدام د يوه پراخه بهير يوه برخه ده چې چين پکې د خپلو مالي زيربناوو د عصري کولو هڅه کوي. د بروکرونو له ادغام څخه رامنځته شوې اداره به ښايي په ډيجيټلي ټکنالوژۍ او مصنوعي ځيرکتيا پانګونه وکړي څو د سياليو جوګه پاتې شي. دا هغه برخه ده چې د چين مالي سکټور وار له مخې پکې د پام وړ لاسته راوړنې درلودلې دي. که چيني بروکرونه له خپلو خدمتونو سره پرمختللي ټکنالوژي مدغم کړي نو په نړيوال مالي صنعت کې به د پام وړ امتياز ترلاسه کړي.
د دې لپاره چې د چین مالی ادارې د ګولډمن ساکس يا جې پي مورګن چېس په څېر ادارو سره سيالي وکړای شي نو بايد نه يوازې د مقياس له پلوه، بلکې د اعتبار او استعداد له پلوه هم وده وکړي. دوی يوازې په هغه صورت کې برياليتوب ته رسېدای شي چې له شته خنډونو تېرې شي.
وخت به دا روښاه کړي چې ایا د لوړې کچې پانګونې بانک رامنځته کول به پر والسټريټ څه اثر وکړي که نه، خو يوه خبره روښانه ده چې د چين مالي جاه طلبي اوس تر بل هر وخت ډيره شوې او نړۍ به یې له نږدې ننداره کوي.
