افغانستان خورا بېوزله و، خو اوس له سختې لوږې سره مخ هېواد دی. د ژغورنې نړیوالې کمېټې مشر ډېوېډ مېلېبند د امریکا کانګرس ته د خبرو پر مهال ویلي، چې افغانستان په وروستیو کلونو کې له بېوزلۍ ځورېده او لوړه سلنه وګړو یې د فقر تر کرښه لاندې ژوند کاوه.
دده په خبره بېوزلي شپږ میاشتې مخکې هم وه او افغانستان د خورا بېوزله هېوادونو په کتار کې و، خو اوس لوږه هم ورسره یو ځای شوې ده. د نوموړي په وینا افغانان دمګړی له سختې لوږې او قحطۍ ځورېږي. میلیبند وایي دی هغه راپورونه تاییدولی شي چې په افغانستان کې خلک له لوږې د خلاصون په موخه د خپل وجود غړي پلوري.
د ژغورنې نړیوالې کمېټې مشر پر امریکا او نورو نړیوالو غږ کړی چې پر افغانستان اقتصادي فشارونه ختم کړي، اوسني سیاست ته د پای ټکی کېږدي او اجازه ورکړي چې موسسات، شخصي کمپنۍ او ملکي ادارات ازاد مالي او اقتصادي فعالیتونه ترسره کړي.
