د کابینې غونډه کې د کابل ښار د ماسټر پلان د تطبيق پرېکړه شوې

د سرپرست حکومت د کابينې ۲۳مه نوبتي غونډه کې د کابل ښار د ماسټر پلان د تطبيق په اړه پرېکړه شوې او کړنلارې ته په کتو هره اداره مکلفه ګڼل شوې؛ ترڅو د ماسټر پلان د تطبيق په برخه کې خپلې چارې او مسوولیتونه ترسره کړي. د کابينې په غونډه کې همدارنګه د کورنيو چارو وزارت ته دنده سپارل شوې، چې د هېواد په بېلابېلو ولايتونو کې چې د کومو ولسواليو د مرکزونو د تعين او تغير پرېکړه کيږي، بايد ټول هغه ارګانونه، چې په تغير شويو ولسواليو کې اداري واحدونه ولري؛ په پلاوي کې شريک کړل شي او وروسته په ګډه پرېکړه وشي. په دې غونډه کې همدا راز د هېواد د سرحدي ولسواليو په اړه د پوهنې، عامې روغتيا، ټولګټو، کليو د بيارغونې او پراختيا، مخابراتو او مالوماتي ټکنالوژۍ وزارتونو ته دنده سپارل شوې، چې د سرحدونو، قومونو او قبايلو او کورنيو چارو وزارتونو سره په همغږۍ د خلکو ستونزو ته په جدي توګه رسېدنه وکړي او په ښه توګه خدمات ورته وړاندې کړي.