د افغانستان د ګاونډیو او سیمه ییزو هېوادونو په ګډون، ځینې هېوادونه د کرونا یوې نوې څپې لاندې کړي دي. یوازې په هند کې په دریو ورځو کې تر یو میلیون زیات کسان پر کرونا اخته شوي او زرګونه کسان یې وژلي دي. دغه راز په ایران کې هم د کرونا نوې څپه خوره شوې چې ډېر کسان پرې اخته شوي دي. په ځینو نورو هېوادونو کې همدا حال دی. په افغانستان کې په رسمي ډول د نوې څپې په اړه څه نه ویل کېږي، خو اوس هم خلک پر کرونا اخته کېږي او معلومه نه ده چې دا نوې څپه ده او که څنګه.
د کرونا نوې څپه د افغانستان ځنډو ته را رسېدلې ده، خو په افغانستان کې تدابیر په نشت حساب دي. داسې وېره ده چې د کرونا نوې څپه به افغانستان ته راشي او له دې امله چې دلته ورته هېڅ ډول تدابیر نشته، نو ډېره مرګژوبله به هم واړوي. له بده مرغه په افغانستان کې نه د کرونا د راتګ د مخنیوي لپاره کوم څه کېږي او نه هم بیا د ناروغانو د درملنې لپاره امکانات شته. د کرونا د مخنیوي لپاره تر ګردو مهمه او اساسي لاره دا ده چې د راتګ مخنیوی یې وشي. مخکې له دې چې کرونا خوره شي، باید حکومت ټول تدابیر ونیسي چې نوې څپه افغانستان رانه شي. ټول هغه کسان چې له ګاونډیو او نورو هېوادونو راځي، باید د کرونا ټېسټ یې وشي. همدا اوس د افغانستان او هند تر منځ ډېر پراوزونه دي او د دې تر څنګ د نورو هغو هېوادونو او افغانستان تر منځ هم پروازونه شته، چې د کرونا نوې څپه پکې خوره شوې ده. له بده مرغه له همدغو هېوادونو افغانستان ته خلک راځي، خو هېڅ ډول تدابیر ورته نشته. حیرانوونکې دا ده چې که هر څوک له افغانستان څخه هر هېواد ته ورځي، باید د کرونا ټېسټ یې کړی وي او پایله یې منفي وي، خو که افغانستان ته راځي، بیا ترې څوک د کرونا د ټېسټ پوښتنه نه کوي. له همدې امله د کرونا د نوې څپې د راتګ وېره جدي ده.
اوس پکار ده چې نور دا بې غوري ونه شي. د هند په ګډون له هر هېواد څخه چې څوک راځي، هم باید تر پرواز مخکې یې په ۲۴ ساعتونو کې د کرونا ټېسټ کړی وي او پایله یې منفي وي او هم چې کله افغانستان ته راځي، دلته باید په هوايي ډګر او نورو ډګرونو او پولو کې یې د کرونا ټېسټ وشي. دا کسان باید آن تر ۱۴ ورځو پورې تر څار لاندې وي. همدا د کرونا د مخنیوي اغېزناکه لاره ده. خو که د کرونا نوې څپه راغله او خپره شوه، نو بیا یې نه په کرنټین مخه نیول کېږي او نه هم زموږ روغتونونه او روغتیايي سیستم دا وړتیا لري چې لازمه درملنه یې وکړي. له همدې امله چارواکي باید نور غفلت پرېږدي او په جدي ډول په دې برخه کې ګامونه واخلي، څو موږ د کرونا له نوې مرګونې څپې خوندي شو.
