روغتیا وزارت هېواد کې د پولیو واکسین پر کارکوونکو برید غندلی

عامې روغتیا وزارت د پولیو واکسین پر کارکوونکو برید غندلی او وايي چې حکومت د پولیو ختمولو ته ژمن دی او د پولیو واکسین د لومړۍ کرښې ټولو کار کوونکو ته د امنیت ډاډ ورکوي. تېره ورځ په کندوز او تخار ولایتونو کې د پولیو واکسین اتو کار کوونکو چې څلور یې ښځې وې د نا پېژندو وسله والو په جلا جلا بریدونو کې خپل ژوند له لاسه ورکړ. د عامې روغتیا وزارت د معلوماتو له مخې په دغو اتو کسانو درې نارینه او یوه ښځه د کندوز په ښار کې درې کسان د همدغه ولایت په امام صاحب ولسوالۍ کې او یو بل بیا د تخار په مرکز تالقانو ښار کې ووژل شول. د عامې روغتیا وزارت د عامه اړیکو دفتر نن د یوې اعلاميې په خپرولو سره دغه بریدونه غندلي او د عاملینو او مجازات غوښتنه یې کړې ده. سرچینه وايي، چې له دغو پېښو وروسته په تخار او کندوز ولایتونو کې د پولیو واکسین کمپاین د نورو بریدونو د مخنیوي او د نورو واکسیناتورانو د خوندیتوب په موخه درول شوی دی.