سره صلیب افغانستان کې د نېمګړو پروژو د بشپړولو ژمنه کړې

د افغانستان برېښنا شرکت وایي چې د سره صلیب نړیوالې کمېټې ورسره د نېمګړو پروژو د بشپړولو لپاره ژمنه کړې ده. ددغه شرکت لخوا په یوه خپره شوې خبرپاڼه کې راغلي د برېښنا شرکت عمومي اجراییوي ریيس ملا محمد حنیف حمزه له تخنیکي ټیم سره  په افغانستان کې د سره صلیب نړیوالې کمیټې له استازو سره په کابل کې ناسته وکړه. په خبرپاڼه کې راغلي، په دې ناسته کې حمزه وویل، چې د سره صلیب یوازینۍ بهرنۍ اداره ده چې په سختو شرایطو کې یې د خپل توان مطابق له برېښنا شرکت سره د انرژۍ په برخه کي مرستې کړي دي. سرچینې زياته کړې، د سره صلیب په استازیتوب جيني د برېښنا شرکت له ګډو همکاریو ترڅنګ ټینګار وکړ چې یاده اداره چمتو ده ترڅو د خپل توان او بودېجي مطابق د برېښنا شرکت نیمګړو پراختيايي پروژو د بشپړولو، په کابل او نورو ولایتونو کې د برېښنا شبکې د پراختیا لپاره د ترانسفارمرونو پېرل، د ترانسفارمرونو تېل، په کندهار او زابل ولایتونو کې د برېښنا جنراتورونو لپاره د تېلو پېرلو او داسی نورو برخو کې خپلو مرستو ته دوام ورکړي.