سوداګرۍ وزارت: تېر کال مو له ۶۰ ډېرو هېوادونو ته صادرات درلودل

د صنعت او سوداګرۍ وزارت وايي، چې په تېر ۲۰۲۳ کال کې یې له ۶۰ ډېرو هېوادونو ته د ۱.۹ میلیارډ ډالرو په ارزښت صادرات کړي. یاد وزارت وايي، دغه صادرات د ۲۰۲۲ کال پرتله دوه سلنه زیات شوي دي. د صنعت او سوداګرۍ وزارت ویاند ویلي چې په تېر ۲۰۲۳ کال کې یې له ۶۰ ډیرو هیوادونو ته صادرات کړي او له ۸۹ هيوادونو یې د اړتیا وړ توکي وارد کړي. نوموړی وايي سره له دې چې د ۲۰۲۳ کال په اوږدو د سالنګ لویه لاره تر کار لاندې او تړلې وه او له ګاونډي هیواد پاکستان سره هم د لویو لارو تړلو او د ډبرو سکرو د صادراتو ستونزې وې خو بیا هم په سوداګریزه برخه کې دوه سلنه زیاتوالی راغلی چې ۴۱ میلیون ډالر کیږي. د سوداګرۍ وزارت د مالوماتو له مخې چې په دغه کال کې د صادراتو په برخه کې د کرنیزو محصولاتو لکه پنبه، وچ اینځر او مڼو برخه کې ډیروالی راغلی. د سوداګرۍ وزارت ویاند وايي، صادرات یې له پاکستان، ازبکستان او تاجکستان سره راکم شوي او له هندوستان، چین او قراقستان سره ډیروالی ښيي، چې د ده په خبره په نړیوال بازار کې یې دا له مثبتو ټکو دي.