سوداګر: د پاکستان لخوا بندیزونو له ګڼو ستونزو سره مخ کړي یو

په چین کې د افغان بار چلوونکو ټولنه وایي، د پاکستان لخوا پر ټرانزیټ لګیدلو بندیزونو دوی ته ګڼې ستونزې پېداکړي او میلیونه ډالره زیان یې کړی دی. یو شمېر سوداګر له سرپرست حکومته غواړي چې د هغوی ستونزې له ډيپلوماټيکو لارو حل کړي. د ننګرهار د سوداګرۍ او پانګونې خونې د مدیره پلاوي یو غړی بیا وايي، که پاکستان پر ټرانزیټي توکو لګول شوي بندیزونه لرې نه کړي، نو دوی اړ دي چې له بدیلو لارو چارو راکړه ورکړه ترسره کړي. تر دې مخکې پاکستاني حکومت افغانستان ته څه باندې ۲۰۰ قلمه وارداتي توکو مخه نیولې وه.