سياسي مرستيال: ا.ا د افغان سوداګرو او پانګه والو ملاتړ کوي

د سرپرست حکومت سياسي مرستيال، د قرطاسيې واردوونکو له يو شمېر سوداګرو سره کتلي دي. د ارګ په خبرپاڼه کې راغلي چې په دې کتنه کې یادو سوداګرو د خپلو چارو او کاروبار په اړه سياسي مرستیال ته معلومات ورکړي او په کور دننه پر تولید د ټینګار ترڅنګ یې؛ له سرپرست حکومت څخه غوښتنه کړې چې د شته ستونزو په حل کې ورسره همکاري وکړي. یادو سوداګرو ویلي چې اوسمهال په افغانستان کې د صنعت غوړېدو لپاره ښه زمینه برابره شوې ده او افغان پانګه وال کولی د کورنیو تولیداتو کچه لوړه کړي. هغوی دغه راز د ستونزو د حل په موخه خپل وړاندېزونه سياسي مرستیال ته سپارلي دي. سياسي مرستیال هم په خپلو خبرو کې، ویلي چې سرپرست حکومت د افغان سوداګرو او پانګه والو ملاتړ کوي او تر خپلې وسې هڅه کوي د هغوی ستونزې لرې او اسانتياوې ورته برابرې کړي. نوموړي ډاډ ورکړی چې د قرطاسيې واردوونکو سوداګرو ستونزې به د حل په موخه له اړوندو ادارو سره شریکې کړي.