سپينه ماڼۍ: د سرتېرو تر وتلو وروسته مو هم حضور دوام کوي

امریکا وایي د سرتېرو تر وتلو وروسته به یې هم په افغانستان کې حضور ادامه لري. د سپینې ماڼۍ ویاندې جین ساکي په تازه څرګندونو کې ویلي چې له افغان حکومت ددوی ملاتړ ادامه لري او د سرتېرو وتل په دې مانا نه دي چې امریکا افغانستان ته شا اړوي. د نوموړې په خبره د سرتېرو تر وتلو وروسته به هم امریکا په افغانستان کې په بېلو برخو کې خپل حضور ته ادامه ورکوي او له افغان حکومت سره به خپلو مرستو ته ژمنه وي. نوموړې ویلي امریکا پر ټولو هغو ژمنو ولاړه ده چې له افغان حکومت سره یې کړې دي او دا خبرې بایډن له ولسمشر غني سره په خپله وروستۍ لیدنه کې هم تکرار کړې ده. د سپينې ماڼۍ ویاندې یو ځل بیا ټینګار کړی چې افغان جګړه باید د خبرو له لارې ختمه شي او تاوتریخوالی د ستونزې د حل لار نه ده.