سره له دې چې طالبان په خپلو رسمي اعلامیو کې د عامه تاسیساتو ساتنه خپل مسوولیت بولي، خو تازه عام ولس او امریکایي چارواکي پر طالبانو نیوکه کوي چې ګواکې دوی په قصدي توګه عامه تاسیسات، په تېره سړکونه او پلونه په نښه کوي. په افغانستان کې د امریکايي او ناټو ځواکونو قوماندان ویلي، عامه تاسیسات له جګړې سره اړیکه نه لري، بلکې دا د افغانانو لپاره جوړ شوي او طالبان یې باید په قصدي توګه تخریب نه کړي. هغه همدا راز پر طالبانو غږ وکړ چې ژر تر ژره تاوتریخوالی کم کړي.
افغانستان څلورو لسیزو جګړو وران ویجاړ کړ، خو هغه تاسیسات چې په تېرو شلو کلونو کې د نړیوالې ټولنې له لوري جوړ شوي، ډېری یې بېرته د طالبانو او افغان حکومت ترمنځ په جګړو کې ویجاړ شوي دي. په دې وروستیو کې طالبانو پر ګڼو ولسوالیو او ولایتونو بریدونه کړي چې د ټولنیزو او نورو رسنیو د راپورونو له مخې، په ډېریو دغو جګړو کې د عامو خلکو د اسانتیا لپاره جوړ شوي تاسیسات ویجاړ شوي دي. د ارزګان په جګړه کې د یوه دارالمعلمین چور کېدل، د کندهار په ارغنداب کې د یوه ستر او مهم پله الوځول، په هلمند کې په جګړه کې د برېښنا سبسټېشن د توکو چور کول او دغه راز د کابل کندهار پر لویه لار د ماینونو ځای پر ځای کول، هغه پېښې دي چې یوازې په دې وروستیو څو میاشتو کې رامنځ ته شوې دي. د دې ټولو پېښو مسوول وسله وال طالبان بلل شوي دي.
سره له دې چې د طالبانو مشر ملا هبت الله هر ځل په خپلو مناسبتي پیغامونو کې د عامه تاسیساتو د ساتنې خبره کوي او پر خپلو وسله والو هم غږ کوي چې عامه تاسیسات وساتي، خو د عمل ډګر بیا برعکس دی او د طالبانو جګړه هره ورځ په هېواد کې د سړکونو، ښوونځیو، پلونو او نورو عامه تاسیساتو د ورانېدو او یا هم د هغه د جوړولو د مخنیوي سبب شوې ده.
اوس تازه په افغانستان کې د امریکايي ځواکونو عمومي قومندان جنرال سکاټ مېلر ویلي چې طالبان په قصدي توګه عامه تاسیسات په نښه کوي. دا لومړی ځل دی چې یو لوړپوړی امریکايي چارواکی د امریکا او طالبانو ترمنځ تر سولې وروسته دغه ډول څرګندونې کوي. هغه به ارو مرو خپلې څرګندونې د قوي معلوماتو پر بنسټ کوي. سکاټ مېلر پر طالبانو سخته نیوکه کړې چې عامه تاسیسات په نښه کوي او په خبره یې، باید له دې کار لاس واخلي. د ده په خبره: ((عامه تاسیسات هغه څه دي چې د نړیوالې ټولنې له لوري د عامو افغانانو د هوساینې او پرمختګ لپاره جوړ شوي دي، هغه د جګړې برخه نه دي، باید طالبان یې له ورانولو لاس واخلي. دوی یې قصداً په نښه کوي)).
بلخوا سکاټ مېلر یو ځل بیا هم پر طالبانو غږ کړی چې تاوتریخوالی کم کړي. نوموړي دغه راز طالبانو ته خبرداری ورکړ چې که تاوتریخوالی کم نه کړي، نو ښايي د سولې خبرې زیانمنې شي. دغه لوړپوړي امریکایي جنرال همدا راز ویلي چې له افغان ځواکونو یې ملاتړ دوام لري او طالبانو ته په کار ده چې تاوتریخوالی کم کړي. د ده په خبره: ((موږ پر خپلو ژمنو ولاړ یو، طالبان هم باید تاوتریخوالی کم کړي. د دې تر څنګ موږ د افغان ځواکونو ملاتړ ته هم ژمن یو او د اړتیا په صورت کې مرسته ورسره کوو)).
تر سکاټ مېلر مخکې هم ګڼو افغانانو په ټولنیزو رسنیو کې پر طالبانو نیوکه کړې چې ګواکي عامه تاسیسات ورانوي او د خلکو د پرمختګ مخه نیسي. دوی د لویو لارو د ویجاړولو، پر سړکونو د ماین اېښودلو، د سړکونو قصدي اړولو او دغه راز د پلونو ویجاړولو پر پېښو په ځلونو غبرګون ښودلی او پر طالبانو یې غږ کړی چې عامه تاسیسات د ولس شتمني ده او له دې تاسیساتو سره دښمني د ولس دښمني ده چې طالبان باید لاس ترې واخلي. طالبانو بیا د سکاټ مېلر پر دې څرګندونو غبرګون نه دی ښودلی.
