عبدالسلام ضعیف: د مذاکراتو راتلونکی پړاو به برخلیک ټاکونکی وي

د طالبانو پخوانی غړی او د سولې د برخې فعال ملا عبدالسلام ضعیف وایي چې د جنورۍ په پنځمه به د طالبانو او افغان حکومت ترمنځ مذاکرات بیا پيل شي. دده په خبره د مذاکراتو دا پړاو به برخلیک ټاکونکی وي او ښایي دواړه لوري پر یو لړ مسایلو توافق رامنځ ته کړي. هغه سره له دې چې په هېواد کې روان تاوتریخوالی د اندېښنې وړ بولي، خو وایي چې ښایي طالبان په لومړي سر کې اوربند ته تیار نه شي. دده په خبره طالبان ډاډه نه دي چې ګواکي افغان حکومت یا امریکا دې پر خپلو ژمنو عمل وکړي نو له همدې امله یې اوربند د لېست په پای کې دی. ضعیف هیله څرګنده کړې چې دواړه لوري ژر تر ژره یوه توافق ته سره ورسېږي او په دې توګه په هېواد کې روانه جګړه پای ته ورسېږي.