په کابل کې د سولې مشورتي لویه جرګه روانه ده، خو د دغې جرګې مشر وایي، همدا چې د طالبانو بندیان خوشي شي، درې ورځې وروسته به په قطر کې بین الافغاني خبرې پيلېږي. ولسمشر غني وړمه ورځ د سولې په اړه مشورتي لویې جرګې ته وینا وکړه او ده هم وویل چې د طالبانو بندیان که خوشي شي، نو ژر تر ژره بین الافغاني خبرې پيلېږي. بلخوا د سولې مشورتي جرګې ډېری غړي او اکثریت کمېټې په دې اند دي چې باید د طالبانو پاتې څلور سوه بندیان هم خوشي شي او بین الافغاني خبرې دې پیل شي.
وروسته له هغې چې د امریکا او طالبانو ترمنځ د سولې هوکړه په دوحه کې لاسلیک شوه، یو شرط پکې دا و چې د بین الافغاني خبرو تر پيل مخکې باید د طالبانو پنځه زره بندیان خوشي شي. افغان حکومت د دې ډلې تر پنځو زرو پورې بندیان خوشي کړي دي، خو طالبان وایي چې حکومت نږدې څلور سوه هغه بندیان نه دي خوشي کړي چې نومونه یې په لېست کې یاد شوي دي. حکومت بیا وایي، په دې لېست کې داسې کسان شامل دي چې په جنایي جرمونو کې ښکېل دي او حق العبد ورباندې دی.
د دې مسئلې تر کړکېچ وروسته ولسمشر غني پرېکړه وکړه چې مشورتي لویه جرګه راوبولي او ولس به پرېکړه کوي چې دغه بندیان خوشي کړي کنه. سره له دې چې د دې جرګې پر جوړېدو او مالي لګښتونو سختې نیوکې روانې دي، خو جرګه روانه ده او نن یې وروستۍ ورځ ده چې د جرګې غړي به وروستۍ پرېکړه هم وکړي. د جرګې غړي وایي چې افغان حکومت او طالبان دې ژر تر ژره بین الافغاني خبرې پيل کړي او نړیواله ټولنه باید د سولې هوکړې د عملي کېدو ضمانت وکړي. دوی ټینګار کوي چې باید لاس ته راوړنې وساتل شي او د لا پیاوړي افغانستان لپاره د سولې پروسه مخ ته یوړل شي.
بلخوا د دې جرګې مشر ډاکټر عبدالله عبدالله پرون په یوه خبري غونډه کې د خبرو پر مهال وویل، که د طالبانو پاتې څلور سوه بندیان خوشي کېږي، نو دغه ډله به درې ورځې وروسته له افغان حکومت سره د خبرو لومړی پړاو پيلوي. د ده په وینا، د خبرو لومړی پړاو په قطر کې پيلېږي او د افغان حکومت مذاکراتي پلاوی به له طالبانو سره مخامخ خبرې کوي. نوموړي زیاته کړه، که څه هم د سولې مشورتي لویې جرګې یو شمېر غړو د طالب زندانیانو له خلاصون سره مخالفت درلود، خو په ټوله کې د کاري کمېټو پرېکړه دا وه چې یاد زندانیان باید خوشې شي، څو د جګړې د دوام لپاره کومه بله پلمه پاتې نه شي. عبدالله څرګنده کړې چې د جرګې ګډونوالو د سولې راتلونکي په اړه هم خپلې اندېښنې او وړاندیزونه له دوی سره شریک کړي او په وینا یې، په مخامخ خبرو کې به د افغانانو ټولو اندېښنو ته په پام له مقابل لوري سره مخ ته لاړ شي.
بلخوا د جرګې غړي وایي چې د طالبانو د زندانیانو د خوشي کولو پلویان دي، خو دغه ډله دې هم ژر تر ژره په هېواد کې روانه پردۍ خونړۍ جګړه پای ته ورسوي. د ملي مصالحې له عالي شورا څخه خپرې شوې خبرپاڼه کې راغلي، د جرګې ګډونوال غواړي چې حکومت دې ۴۰۰ طالب زندانیان خوشې کړي، څو په هېواد کې د جګړې دوام ته بله هېڅ پلمه پاتې نه شي، دواړه لوري دې باعزته سولې ته د رسېدو لپاره نرمښت وښیي، د طالبانو له خوشې کېدو سره دې سراسري اوربند ټینګ او دواړه لوري دې ورته ژمن اوسي، بین الافغاني مذاکرات دې ژر تر ژره پیل شي، د سولې خبرې دې د افغانانو په مشرۍ په افغانستان کې ترسره شي.
له دې سره به د سولې مشورتي لویه جرګه نن هم دوام کوي، سره له دې چې طالبانو دغه جرګه غیر قانوني بللې ده او د بشري حقونو خپلواک کمېسیون یې بیا پرېکړه د معافیت فرهنګ د پياوړتیا په مانا بولي، خو دغه جرګه به نن خپله وروستۍ پرېکړه اعلانوي او ولسمشر به تر هغه وروسته د طالب بندیانو په اړه پرېکړه کوي.
