عراقچي: د افغانستان د اوسني وضعیت مسوول امریکا ده

د ایران د بهرنیو چارو وزارت سیاسي مرستیال سید عباس عراقچي ویلي، امریکا چې هر ځای ته تللې پرته له ستونزو او خنډونو یې هیڅ هم په میراث  نه دي پرېښي. هغه د افغانستان لپاره د ملګرو ملتونو له ځانګړي استازي مټ کنودسن سره په لیدنه کې ویلي چې په افغانستان کې اوسنی وضعیت د امریکا د ماشومانه سیاستونو زېږنده دی. په ورته وخت کې د ملګرو ملتونو ځانګړي استازي بیا په افغانستان کې د ایران له وروستیو بشردوستانه هڅو مننه کړې ده او زیاته کړې یې ده چې ایران له کلونو راهیسي له افغانستان سره ښه ګاونډیتوب کړی دی او دوی هیله لري چې دغه هېواد د افغان کډوالو لپاره د اسانتیاوو برابرولو کې نورې هلې ځلې هم وکړي. هغه دغه راز د افغانستان د وضعیت د رغوونې په برخه کې د سیمې رول مهم یاد کړی دی او ټنیګار یې کړی دی چې نړیوال دې هم له افغانانو سره د مرستې لپاره اړین ګامونه واخلي.