عمران خان یو ځل بیا: افغانستان کې د هېڅ ډلې او ګټې په پاللو پسې نه یو

د پاکستان لومړي وزیر عمران خان یو ځل بیا ویلي چې په افغانستان کې د مداخلو پلوی نه دی. نوموړي د پارلمان یوې غونډې او په خپله یوه تازه مرکه کې ویلي چې امریکا ترې غواړي څو د سولې په موخه پر طالبانو فشار راولي خو په وینا یې دوی ددې کار وړتیا نه لري. هغه ویلي په پاکستان کې یوازې د طالب مشرانو کورنۍ دي چې دوی یې د کورنۍ غړي نه شي زنداني کولی. عمران خان یو ځل بیا ویلي چې په افغانستان کې د سولې پلویان دي او ددې غوښتونکي دي چې په دغه هېواد کې روانه جګړه ژر تر ژره ختمه شي. هغه ویلي په افغانستان کې د هېڅ ډلې او لوري ملاتړ نه کوي او نه هم په دغه هېواد کې د کومې ستراتژيکې ګټې په لټه کې دي، خو غواړي افغانان په خپلو کې سره کېني او روانې جګړې پای ته ورسوي. هغه زیاته کړې دوی هغه څه غواړي چې افغانان یې ځان ته غواړي او پاکستان په دې برخه کې مرسته ورسره کوي. عمران خان تر دې وړاندې هم دغه ډول څرګندونې کړې دي، خو افغان حکومت په دې باور دی چې پاکستان د سولې په مسئله کې دوه مخی چلند کوي او په هېواد کې د روانې جګړې تر شا دی.