فراه کې د ۱۷ ښوونځیو ودانیو بیارغونې چارې بشپړې شوې

په فراه ولایت کې د څه باندې ۱۰ میلیونه افغانیو په لګښت د پوهنې رياست او ۱۷ ښوونځيو ودانۍ له بيا رغونې وروسته ګټې اخیستنې ته وسپارل شوې. د فراه ولایت د پوهنې رییس اختر محمد زعيم وویل چې په دې ولایت کې د دولت له بودجې څخه ۱۷ښوونځي او د پوهنې رياست ودانۍ د ۱۰ ميليونه، ۵۷۷ زره افغانيو په لګښت له بيا رغونې وروسته رسماً ګټې اخیستنې ته وسپارل شوې. نوموړي همدارنګه زياته کړه، چې په دغه ولایت کې د تېرو سختو او اوږدو جګړو پرمهال ډېری ښوونځي له منځه تللي، چې د يادو ښوونځیو له رغولو سره سم به د پوهنې په برخه کې د پام وړ بدلون او اسانتيا رامنځته شي.