قزاقستان د هرات زلزله ځپلو ته نورې بشري مرستې هم را لېږلې دي

د قزاقستان د بشري مرستو ۲۷ واګونه د افغانستان په خوا را روان شوي دي. د قزاقستان ولسمشر قاسم جومارت تکایف ژمنه کړې وه چې هېواد به یې د افغانستان له زلزله ځپلو سره شاوخوا ۱۶۵۹ ټنه خوراکي او غیر خوراکي توکي مرسته کوي. د دې مرستو لومړۍ جوپه تېره چهارشنبه هرات ته رسېدلې وه چې په کې درمل او نور طبي وسایل شامل وو. په دغو ۲۷ واګونو کې چې تازه له الماتې او قرغندې سیمو را استول شوې غنم، وريجې، غوړي، شیدې،کمپلې، جامې او کټونه پکې شامل دي. ګڼو نورو هېوادونو له هغې ډلې چین هم هرات ته مرستې را لېږلې دي.