له افغانستان تللي کاناډایي عسکر وایي بیا به عبثو جګړو کې ګډون ونه کړو

یوې کاناډایي رسنۍ د یو شمېر هغو کاناډایي عسکرو له قوله چې په افغانستان کې یې ماموریت ترسره کړی دی ویلي چې په افغانستان کې یې جګړه بې ګټې وه او دوی به بیا په ورته عبثو جګړو کې ګډون ونه کړي. سي‌بي‌سي د یادو عسکرو له قوله وایي چې د افغانستان جګړه په هیڅ قرباني نه ارزېده او نباید په دغه هېواد کې په میلیاردونو ډالر او د سرتېرو وینې ضایع شوې وای. هغوی زیاته کړې ده چې افغانستان کې جګړه سخته نه وه خو په کولو نه ارزېده. د دوی په باور امریکا او ملګري هېوادونه باید هغه وخت لا له افغانستان څخه وتلي وای چې پوهېدل دا جګړه نه ګټل کېږي او نه هم د ګټلو ارزښت لري. په ورته وخت کې ډېری امریکایي عسکر هم په همدې باور دي او له افغانستان څخه د عسکرو د وتلو ملاتړ کوي.