بایډن له افغانستان د سرتېرو په ایستلو ستره تېروتنه کړې ده. مخکښ امریکايي سناتور لیندسي ګراهام په خپله یوه تازه مرکه کې پر بایډن سختې نیوکې کړې دي او په وینا یې هغه تل د امریکا بهرنی سیاست زیانمن کړی دی.
ګراهام وایي له افغانستان د امریکایي ځواکونو بې وخته وتل ستره تېروتنه وه او په دغه هېواد کې د امریکا متحدینو ته شا اړول دغه هېواد په نړیواله کچه بې باوره کړی دی. هغه وایي ددې وخت دی چې د بایډن او د هغه د ناسمو سیاستونو پر وړاندې امریکایي وګړي اقدام وکړي.
ګراهام همدا راز وایي چې بایډن د افغانستان په مسئله کې سرتمبګي کوله او د امریکایي جنرالانو خبرداریو او اټکلونو ته یې ارزښت نه ورکاوه، نو له همدې امله په افغانستان کې د هر پېښېدونکي وضعیت مسوولیت پر بایډن دی.
