مالیې وزارت: ژر به د دولتي کارکوونکو د ۲ میاشتو معاشونه ورکړل شي

د افغانستان ا.ا د مالیې وزارت یو ځل بیا ټولو دولتي کارکوونکو ته د هغوی د دوو میاشتو د معاشونو د ورکړې ژمنه کړې ده. ملي راډیو ټلویزیون د مالیې وزارت د ویاند له قوله ویلي چې په نږدې راتلونکي کې به د ټولو دولتي مامورینو د دوو میاشتو معاشونه د دولت له بودجې څخه اجرا شي. ا.ا تر دې وړاندې هم له دولتي کارکوونکو سره د هغوی د معاشونو د ورکړې ژمنه کړې وه خو د هغوی له شکایتونو سره سره تر اوسه پورې په دې برخه کې عملي اقدام نه دی شوی. که څه هم د دولتي کارکوونکو معاشونه د کابل تر سقوط مخکې هم پر دولت پاتې دي خو واک ته د ا.ا تر رسېدو وروسته اقتصادي ستونزې د دې باعث شوې دي چې د دولتي کارکوونکو معاشونه په میاشتو وځنډېږي.