محب: د تلپاتې سولې لپاره باید د جګړې اصلي لاملونه پیدا شي

د ولسمشر د ملي امنیت سلاکار حمدالله محب ویلي چې له وسله والو طالبانو سره د روانو مذاکراتو له لارې یوازې مؤقتي سوله راتلی شي خو د ده په خبره، د دایمي سولې لپاره په کار ده چې د جګړې ټول اصلي لاملونه پیدا شي. محب نن د سرحدونو او قبایلو چارو وزارت په نوښت “د امن او ثبات” په نامه جوړ شوي کنفرانس ته چې له پښتونخوا څخه راغلو مېلمنو هم برخه کې پکې اخیستې وه وویل، افغانانو ته د امن او سولې بې‌ مخینې فرصت په لاس ورغلی دی چې بايد موقتي سولې ته د رسېدو پر ځای پر تلپاتې ثبات فکر وکړل شي او د خلکو د هوساینې لپاره د راتلونکو پنځوسو کلونو لپاره برنامې جوړې شي. په ورته وخت کې په کنفرانس کې د ډېورند کرښې د پورې غاړې راغلیو ملمنو له ډلې غلام محمد بلور وويل، چې د افغانستان روانه جګړه هيڅ ډول ديني او فرهنګي ارزښتونو ته درناوی نه لري، له بهره تمويلېږي او داسې لاسونه يې تر شا دي چې د خاورې او ارزښتونو له حساسيتونو سره بې‌پروا او نابلده دي.