ملک سلمان؛ افغانستان کې وروستی تاوتریخوالی غندلی دی

د سعودي عربستان کابینې په خپله وروستۍ غونډه کې په افغانستان کې روان تاوتریخوالی غندلی دی. د کابینې دغه غونډه د ملک سلمان په مشرۍ ترسره شوې او په هغه کې په کابل پوهنتون کې وروستی ترهګریز برید هم غندل شوی دی. د سعودي عربستان پادشا وایي چې په وروستیو کې په افغانستان کې تاوتریخوالی ډېر شوی چې دوی یې په کلکو ټکو غندي او همدا راز هر هغه برید غندي چې د عامو وګړو د تلفاتو او مرګ ژوبلې سبب ګرځي. د تېرې دوشنبې په ورځ په کابل پوهنتون کې وسله وال برید د ګڼو هېوادونو غبرګونونه پارولي دي. د ملګرو ملتونو په ګډون ګڼو نړیوالو ادارو او هېوادونو دغه برید غندلی او هغه یې له ټولو انساني اصولو او قوانینو سره په ټکر کې عمل بللی دی.