ملګرو ملتونو د افغان پناه غوښتونکو په اړه اندېښنه ښودلې

په افغانستان کې د ملګرو ملتونو د کډوالو د عالی کمېشنرۍ دفتر وايي چې ۲.۸ ميليونه افغانان بهرنيو هېوادونو ته کډوال شوي او وضعيت ته په کتو د دې شمېرو د لوړيدو احتمال ډير دی. دې ادارې پر ټويټر خپرو کړو معلوماتو کې ويلي چې ۳.۴ ميليونه افغانان په کور د ننه بې ځایه شوي او ګڼ شمېر نور لا د پناه اخيستلو په هڅه کې دي. د کډوالو عالي کمېشنرۍ  ويلي چې د افغان کډوالو د وضعيت ښه کولو لپاره بايد له هغو هېوادونو سره مرستې وشي چې کډوالو ته يې ځایونه ورکړي دي. د ملګرو ملتونو د کډوالو عالي کمېشنري وايي چې روان کال په نړيواله کچه د کډوالو او بېځايه شويو کسانو شمېر ۲۵ سلنه ډير شوی او ټولټال ۲۶.۷ ميليونو  تنو ته رسېدلی دی. دا اداره وايي چې په هرو ۷۷ کسانو کې يو کس د مختلفو عواملو له کبله بېځايه شوی دی. افغانستان د کډوالو د شمېر له پلوه تر سوريې، وينزويلا او اوکراين وروسته په څلورمه درجه کې راځي.