مودي: د سیمې هېوادونه باید د کرونا پر وړاندې ګډه تګلاره جوړه کړي

د هند لومړی وزیر وایي د سیمې هېوادونه دې د کرونا د پراختیا پر وړاندې د مبارزې لپاره پر یوه ګډه او واحده تګلاره کار وکړي. نریندا مودي د سارک سازمان پر غړو هېوادونو چې افغانستان هم په کې دی غږ کړی چې د کرونا ویروس د پراختیا د مخنیوي لپاره سره یو شي. دده په وینا دغه ویروس د هېوادونو په همکارۍ او ګډه تګلاره له منځه تللی شي. بلخوا افغان حکومت د مودي له دغه وړاندیز هرکلی کړی دی او په دې برخه کې یې د ګډې همکارۍ پر ژر رامنځ ته کېدو ټینګار کړی دی. د ولسمشر ویاند صدیق صدیقي وایي چې په سیمه کې ددغه ویروس پر وړاندې د ګډې مبارزې جدي اړتیا ده. مودي داسې مهال دغه څرګندونې کوي چې تازه په هند کې د کرونا ویروس مثبته پېښه ثبت شوې ده.