مولوي عبدالکبیر له بېګدلي سره د افغان کډوالو په اړه خبرې کړې دي

د کډوالو او بېرته راستنېدونکو چارو سرپرست وزیر په کابل کې د ایران له سفیر علي رضا بېګدلي سره د افغان کډوالو د وضعیت په اړه خبرې کړې دي. په دې کتنه کې بېګدلي، هرات او نیمروز ولایتونو ته د خپل وروستي سفر جزئیات شریک کړي او زیاته یې کړه چې د راستنېدونکو افغانانو د ستونزو د حل لپاره دوه اړخیزو کمېټو کار پیل کړی او تر دې مهاله ګڼې ستونزې هوارې شوې دي. نوموړي وویل چې د ایران دولت د راستنېدونکو افغانانو پر ویزو جریمه معاف کړې او د هغوی د شخصي وسایلو د انتقال ګمرکي تعرفې یې هم لغوه کړې دي. د ایران سفیر دغه راز ټینګار کړی، چې ډېری افغانان په داوطلب ډول له ایران څخه راستانه شوي دي.