م.م: په افغان مېرمنو او نجونو دې محدودوونکې تګلارې لغوه شي

ملګرو ملتونو د ا.ا له سرپرست حکومت غوښتي چې د نجونو او ښځو د بشري حقونو او ازادیو محدودوونکې تګلارې او مقررات لغوه کړي. د ملګرو ملتونو د عمومي اسمبلۍ مشر تبا کروشي وویل چې افغانستان په نړۍ کې یوازینی هېواد دی چې نجونو ته په کې د تعلیم بشپړ حق نه ورکول کېږي. د ملګرو ملتونو دې غونډې کې د ۱۱۶رایو په اساس د ا.ا په اړه یوه قطعنامه او پرېکړه لیک هم تصویب شو. هېڅ یو هېواد دغه پرېکړه لیک ته مخالفه رایه ورنکړه. په دغه پرېکړه لیک کې له ا.ا څخه غوښتل شوي‌ دي چې د بشر د حقونو درناوی وکړي او ویې ساتي، همه شمول حکومت دې جوړ کړي او د ترهګرۍ په ضد دې مبارزه وکړي. همدغه راز دغه پرېکړه لیک کې له ط البانو غوښتل شوي چې د ښځو، نجونو او اقلیتونو حقونو ته درناوی وکړي. ملګرو ملتونو په همدې غونډې کې د افغانستان د اقتصادي‌ وضعیت په اړه هم اندېښنه ښودلې او ویلي یې دي چې د دغه هېواد د بانکدارۍ او مالي برخو د بیا فعالېدو لپاره باید هڅې وشي‌ او د افغانستان ګنګل شوې شتمنۍ دې په درېیم هېواد کې د لاسرسي وړ وګرځول شي.