ناروې کې د اسلو فورم بحثونه پیلېږي؛ افغانستان یې د اجنډا مهم ټکی دی

د ناروې د بهرنيو چارو د وزيرې اننيکين هويتفيلډټ په مشرۍ د اوسلو فورم پر نړيوالو کړکيچونو دوه ورځني بحثونه پيلوي. د دې فورم بحثونه نن پيل کيږي او ټاکل شوې چې د افغانستان مسئله يې هم په اجنډا کې شامله وي. د ناروې حکومت په يوه اعلاميه کې ويلي چې شاوخوا سلو تنو په فورم کې د ګډون بلنه منلې او دا ټول هغه کسان دي چې د شخړو په هواري کې يې د منځګړو رولونه لوبولي، يا د حکومتونو چارواکي پاتې شوي او يا هم په شخړو کې د ښکېلو غاړو استازيتوب کوي. ټاکل شوې چې د دې فورم ګډونوال د شخړو د هواري او سولې لپاره د خپلو دیپلوماتیکو هڅو تجربې له یوبل سره شریکې کړي. له افغانستانه هم څو تنو ته په دې غونډه کې د ګډون بلنه ورکړل شوې خو تراوسه یې نومونه نه دي په ډاګه شوي.