له افغانستانه د نړیوالو ځواکونو له وتلو وروسته د حامد کرزي نړیوال هوايي ډګر د امنیت د خوندیتوب او دغه راز د افغان ځواکونو د روزنې په تړاو اندېښنې مخ پر ډېرېدو دي. د ناټو مشرانو د نورو مهمو امنیتي مسایلو ترڅنګ په افغانستان کې د خپل نظامي حضور د پای ته رسولو او دغه راز د یاد هېواد د امنیتي وضعیت په تړاو هم خبرې وکړې.
که څه هم د ناټو دې سرمشریزې ته د افغانستان په استازولۍ څوک نه وو ور بلل شوي، خو یاد سازمان په افغانستان کې د خپل نظامي حضور له پای ته رسولو وروسته هم له دغه هېواد سره د مالي همکاریو ډاډ ورکړ.
د ناټو عمومي منشي ینس سټولټنبرګ د یاد سازمان دې سرمشریزې غونډې ته د خبرو پرمهال وویل چې دوی له خپلو متحدینو سره پر خبرو بوخت دي، ترڅو په افغانستان کې د خپل نظامي حضور له پای ته رسولو وروسته هم وکولي شي چې د حامد کرزي نړیوال هوايي ډګر امنیت خوندي کړي او دغه راز له یاد هېواد څخه بهر د افغان ځواکونو د روزنې او سلا مشورې پروسه پرمخ بوځي.
نوموړي وویل: «په افغانستان کې د نظامي حضور له پای ته رسولو وروسته موږ له دغه هېواد سره مالي مرستو ته دوام ورکوو، دغه راز موږ له خپلو متحدینو، امریکا او ترکیې سره په ګډه کار کوو، ترڅو د کابل نړیوال هوايي ډګر امنیت خوندي کړو، په افغانستان کې د ډيپلوماټيک حضور په موخه دا زموږ او د ټولې نړیوالې ټولنې لپاره اړینه ده، ترڅو هلته خوندي او فعال نړیوال هوايي ډګر ولرو».
په ورته مهال د امریکا ولسمشر جوبایډن هم دې سرمشریزې ته د وینا پر مهال ډاډ ورکړ، چې په افغانستان کې به د متحده ایالتونو له نظامي حضور وروسته، امریکا له یاد هېواد سره خپلو مالي همکاریو او دغه راز د افغان ځواکونو د روزنې بهیر ته دوام ورکوي.
بایډن زیاته کړه: «زموږ ځواکونه بېرته خپل کور ته راستنیږي، خو په افغانستان خپل قوي ډيپلوماټیک حضور ته دوام ورکوو، له افغانانو سره به په اقتصادي او بشري برخو کې زموږ مرستې او دغه راز د افغان ځواکونو د رزونې ماموریت دوام وکړي، موږ په دې برخه کې خپلو متحدینو ته هم هرکلی وایو، خو ډاډ ورکوو چې افغانستان به بیا د ترهګرو په خوندي پټنځای نه بدلېږي».
بلخوا د ملکي هوايي چلند ادارې ویاند نعیم صالحي بیا وايي چې دوی د بهرنیو ځواکونو له حضور او مستقیم ملاتړ پرته هم پوره چمتووالی لري ترڅو د حامد کرزي نړیوال هوايي ډګر ټولې هغه چارې په عادي ډول پرمخ بوځي، چې د دوی اړوند دي. د افغانستان د ملي امنیت شورا هم ډاډ ورکوي چې د بهرنیو ځواکونو له وتلو وروسته به د هېواد هوايي ډګرونه د نړیوالو په ملاتړ فعال وي او دغه راز به د افغان ځواکونو د روزنې او سلا مشورې پروسه هم دوام کوي.
خو عام افغانان بیا نیوکه کوي، چې د بهرینو ځواکونو له وتلو وروسته نړیوال ټولنه د افغانستان د امنیتي وضعیت په اړه له مسوولیت ځان خلاصوي او یوازې د خپلو وګړو او سفارتونو د خوندیتوب په موخه حامد کرزي نړیوال هوايي ډګر پر خوندیتوب ټينګار کوي.
دا په داسې حال کې ده چې په دې وروستیو کې له افغانستانه د بهرنیو ځواکونو له وتلو سره جوخت د حامد کرزي نړیوال هوايي ډګر د امنیت په تړاو اندېښنې ډېرې شوي دي. که څه هم ترکیې د دغه هوايي ډګر د مدیریت او امنیت د تامین مسوولیت ته ټټر وهلی، خو طالبانو بیا له دغه کار سره کلک مخالفت ښودلی دی.
