ننګرهار او لغمان کې د چاودنو له امله ۲۵ ملکیان ټپيان شوي دي

د ننګرهار او لغمان ولايتونو چارواکي وايي چې په يوې چاودنې او د امنيتي ځواکونو او وسله والو طالبانو ترمنځ نښته کې ۲۵ ملکيان ټپيان شوي دي. د ننګرهار د امنيه قوماندانۍ وياند فريد خان وويل چې پرون شاخوا درې بجې د جلال اباد ښار د اوومې ناحيې اړوند د سره رود ولسوالۍ اړوند دوسرکې سیمه کې چاودنه شوې ده. د ننګرهار د عامې روغتيا رياست چارواکي وايي، د چاودنې له ځايه ورته ۸ ټپيان وروړل شوي چې له ډلې يې شپږ تنه تر لومړنۍ درملنې وروسته بېرته رخصت شوي دي. د پېښې عيني شاهدان هم وايي چې چاودنې اته کسان ټپيان کړي دي. د يو بل خبر له مخې د لغمان ولايت چارواکي وايي، د دغه ولايت اليشنګ ولسوالۍ کې د امنيتي ځواکونو او وسله والو طالبانو ترمنځ نښتو کې د وسله والو مرمۍ د ملکي خلکو په کورونو لګېدلي چې له امله يې ۱۷ ملکي وګړي ټپيان شوي دي. د لغمان ولايت د رسنيو دفتر وايي چې په دغه پېښه کې د یوې ښځې په ګډون لس تنه ټپیان روغتون ته وړل شوي. د سيمې اوسېدونکي وايي، چې د جګړې پرمهال مرمۍ له دواړو خواوو د خلکو په کورونو لګېدلې دي. وسله والو طالبانو په دې تړاو څه نه دي ويلي.