نیمروز کې وروستیو سېلابونو لسګونه کورونه نړولي دي

د نیمروز له طبیعي پېښو سره د مبارزې رییس وایي، د وروستیو سېلابونو له امله په دلارام ولسوالۍ کې له ۲۷۰۰ جریب ډېرې کرنیزې ځمکې او لسګونه کورونه ویجاړ شوي او لسګونه څاروي له منځه تللي دي. د نیمروز له طبیعي پېښو سره د مبارزې رییس محمدقاسم محمد وویل، د سروې ټيمونو د معلوماتو له مخې، په دلارام ولسوالۍ کې د وروستیو سېلابونو له امله ۹ کورونه په بشپړ او ۳۷ نور په نیمه ډول ویجاړ شوي دي. نوموړي زیاته کړه، په یاده ولسوالۍ کې د وروستیو سېلابونو له امله ۱۵۰ څاروي له منځه تللي، ۱۵۰ ژورې څاه‌ګانې او له ۲۷۰۰ جریب ډېرې کرنیزې ځمکې په بشپړ ډول تخریب شوې دي. د سرچینې د معلوماتو له مخې، ډېری تخریب شوي کښتونه د غنمو او اوربشو وو. هغه وویل، د دغو سېلاب‌ځپلو په اړه راپور چمتو او د مرستو لپاره اړوندو حکومتي ادارو او مرستندویه موسسو ته استول شوی څو له دوی سره مرستې وشي.