هرات کې تېر کال د سرطان ۶۵۰۰ ناروغان ثبت شوي

د هرات ولایت د حوزوي روغتون مسوولین وايي، چې په تېر یوه کال کې په دغه روغتون کې د سرطان ۶۵۰۰ ناروغان ثبت شوي دي، چې دا مهال یې یوشمېر تر درملنې لاندې دي. په یاد روغتون کې د سرطان څانګې مسوولینو ویلي، چې د ناروغانو د شمېر له مخې یادې ناروغۍ ۳۰ سلنه زیاتوالی موندلی دی. د مسوولینو په خبره يوازې په تېرو ۴ کلونو کې د هرات په حوزوي روغتون کې د سرطان په بېلابېلو ډولونو څه باندې ١٦ زره کسان تر درملنې لاندې نیول شوي دي. مسوولین وایي، د ټولو ناروغانو د درملنې لپاره لږ تر لږه ۱۰۰ بسترونو ته اړتیا لري چې د عملیاتو خونې، رادیوتراپي او نورې اړینې آسانتیاوې باید ولري. دا په داسې حال کې ده، چې لاهم په افغانستان د سرطان د تشخیص او درملې لپاره کوم مجهز روغتون نشته او په دې برخه زیات شمېر ناروغ لرونکي او ناروغان له ګڼو ستونزو سره مخ دي.